مدونة عصفور المدينة

مدونة نظيفة إسلامية (زيادة الإيمان) الطرائف والتناقضات التخسيس والصحة العامة الإدارة والتنمية البشرية

تاج 006

Posted by ctybrd on October 18, 2007

التاج مرره لي صديقي العزيز الأستاذ سيد(عازف الناي)
وأيضا صديقي المهندس الصاعد محمد (زحل الفلكي)
رجاء الصبر والقراءة طويل شوية بس حلو .. نطينا واحد في العدد عشان التاج اللي عند الباحث وبن حجر
قالوا لك اختار عصر من عصور مصر علشان تعيش فيه تختار أى عصر وفى عهد أى حاكم .. واشمعنى ؟


لم يمر على مصر عصر مثل عصر عمرو بن العاص رضي الله عنه وأرضاه ومن خلفه خليفة رسول الله ومثال العدل الفاروق عمر رضي الله عنه القائل

متى استعبدتم الناس وقد ولدتهم أمهاتهم أحرارا

أول أولوية فى حياتك عيلتك ولا شغلك ولا اصحابك

عائلتي وبتطرف بس الموازنة لا أعتقد أنها صعبة بين الشغل والعائلة أما بين الأصحاب والباقي فصعبة أحيانا


ايه أكتر حاجة بتحبها فى رمضان ؟

تنظيم الوقت والإحساس بأهمية اللحظة وإحساس الندم عند طلوع الفجر في العشر الأواخر

اوصف أجمل فطار ممكن تفطره ؟

لو تقصد في الصيام يبقى أجمل إفطار أفطره هو الإفطار اللي مش يضيع وقت ويا حبذا لو كان بين الأذان والإقامة

ولو تقصد في الأيام العادية يبقى الفول بزيت الزيتون والقهوة بعد صلاة الفجر
(فيه حد جاب سيرة البصل؟)

لو انت حاكم على مجموعة من الأفراد حتكون عادل ؟ طب حتتأكد أزاى انك حاكم عادل ؟؟

أقسم بالله العظيم ان أكون عادلا بين رعيتي ما استطعت وألا أتبع الهوى فإن الله عز وجل قال

يا داوود إنا جعلناك خليفة في الأرض فاحكم بين الناس بالحق ولا تتبع الهوى فيضلك عن سبيل الله

إنما مش قلتوا لي هم مين مجموعة الأفراد دول ؟
واتأكد إني عادل من قلبي أني أنوي العدل خدوا مني هذه الحكمة :الحاكم الجائر إذا صدق نفسه وصدق حاشيته أنه عادل فهو أحمق بل إن صدقت الحاشية التملق الذي يقولونه فهم حمقى.
ولكن الحقيقة أن كل ذلك يكون للاستهلاك المحلي وواقع الأمر يعلمونه ولكنه الهوى كما قال الله عز وجل يا إما الحكم بالحق يا إما اتباع الهوى يعني إذا نوى الحق ولم يوفق إليه واخطأ اجتهاده فهو عادل أيضا ولكن اتباع الهوى أمر آخر

ايه اللى بيبوظ الحكام .. نفسهم ؟ ولا الشعب ؟ ولا الحاشية المقربة ؟؟

نفسهم وشهواتهم ومن ضمنها شهوة الزعامة ويكفل الاستمرار سكوت الشعب وتأكل الحاشية من خلفهم

مين أكتر اعلامى مصرى بتحترمه ؟


يعني إيه إعلامي ؟حقيقة الإعلام بايظ في الأغلب إلا لو اعتبرنا المدونات من الإعلام يبقى فيه كثير
أو الصحافة يبقى الأستاذ/ فهمي هويدي رغم اختلافي معه في بعض المنطلقات (من غير زعل) ولو اعتبرنا اللي في الجزيرة تبعنا يبقى كثير أوي

قريت ديوان “………” صاحب بلوج “……….” عن دار “…….” ولا لسة ؟؟
هو التاج ده دعاية للمدونة ولا الديوان ولا الدار ولا لسة

لو ممكن تشتغل شغلانة تانية كنت تتمنى تبقى ايه ؟؟

مأذون أو مدرس لغة عربية

ايه تانى بلد تتمنى تعيش فيها بعد مصر ؟؟

اسكندرية🙂

اوصف ترتيبات اجمل فرح ممكن تحضره ؟

حضورى للافراح اصلا قليل جدا(إجابة منقولة) ولكن الفرح اللي بينطبق عليه المثل انتم عارفينه العروسة للعريس الخ
وأن أكون من المتاعيس الذين تم فك أسرهم سريعا وبدون مأثم ولا مغرم يبقى فرح ممتاز جدا

بتراعى كلام الناس والقيل والقال ؟؟ ولو اه او لا قول ليه ؟
لأ لأ لأ
لأني أبني تصرفاتي على تفكير عميق وثوابت وأعلم علم اليقين أن تصرفات الناس وقيلهم وقالهم غالبها “يضلوك عن سبيل الله”

صحيت من النوم ملقتش الموبايل ولا الكمبيوتر ولا الكاميرا الديجيتال ورجعنا لعصر الحمام الزاجل والحصنة هتكون سعيد ؟
الموضوع صعب بس بيحصل ساعات وباكون سعيد
وياريت تقرا التدوينة دي برزخيات

السعادة هى ..؟

قل بفضل الله وبرحمته فبذلك فليفرحوا هو خير مما يجمعون

وفضل الله ورحمته هو الإسلام والقرآن

عندك أمل ؟ اسبابك ؟
عندي أمل في إيه؟ حقيقة فيه حاجات ينفع فيها الأمل وفيه حاجات لازم قطع الأمل ودي نقطة لو الناس تفهمها تستريح

لما بتحب تهرب من كل شئ بتروح فين ؟؟
مش حاقولك …ده سر
مع إني قلته في تدوينة يوم خميس مش حاحط اللينك بتاعها عشان ما تعرفش المكان

امتى اول مرة خدت فيها نفس طويل وقلت ياااه انا فعلا كبرت ؟؟
يا نهارك أبيض ده سؤال مؤلم جدا.. من سن 6 سنين عند دخولي المدرسة اول يوم كنت حزين جدا
وقعدت أقول لنفسي ياواد يا محمد الأيام اللي عدت دي شكلها مش حتتعوض والله أنا صادق في الكلام ده
أما حاليا فباليوم يا اخواننا ملامحي تتغير كل شوية الصلعة تزيد لدرجة الراجل مش عرفني في المطار وقعد يسألني أسئلة مفاجئة من قبيل انت منين واسمك إيه… باحس إني كبرت لما باشوف حد من زمايلي القدامى

اما بتعمل عمل خير بيكون ايه هو دافعك الاول ؟
الله المستعان السؤال ده صعب مش حاجاوبه

بتشرب سجاير ؟؟ وايه شعورك اما ست او راجل بيشرب سجاير ؟ ليه ؟
مش باشرب سجاير وهي بتتدخن مش بتتشرب
لي قصص مع موضوع التدخين حاقول واحدة بس ……كل شللي!! كانوا بيدخنوا وفجأة وبعد سنتين من صحبتهم قررت أن أدخن كدة قرار فقلت لواحد هات سيجارة .. قل لي بتعملوا إيه يلا هب ماشي تمام….وبعدين مرة تانية هات سيجارة برضه…. لمحني واحد من الشلة ضخم الجثة طوله 210 سم ووزنه حوالي 150 كيلو وبيلبس حذاء مقاس 47 ويدخن واسمه شريف حفظه الله بادعيله كثير جدا وكان يدخن بشراهة مش عارف دلوقت إيه؟ جاء جري وضربني بوكس عنيف في بطني بجد مش هزار وضرب زميلي اللي ادالي السيجارة وقال لي إيه اللي انت بتهببه ده ورمى السيجارة في الأرض وله دين في عنقي رغم إني مش قابلته من سنين طويلة أسأل اله أن يثيبه خيرا ويصلحه.
بتعرف ايدك اليمين من الشمال ازاى ؟؟
اليمين كويسة
ايه اكتر الة موسيقية بتحبها ؟
مش باسمع موسيقى وعايش وسعيد ودماغي عالي ومبسوط ومش ناقصني أي حاجة
بس باحب صوت العصافير الصبح
فى رأيك ليه الذوق والنخوة اتعدموا ؟
يا راجل هما اتعدموا طيب وتهمتهم كانت إيه أمال احنا بنعمل إيه هنا
ما احنا كلنا ذوق ونخوة مع بعض لو اتعدموا يا أخي كنت سترى أوضاعا أخرى أسوأ من الوضع المأسوي الذي نحن فيه
ايه الحاجة اللى لو حصلت لك حتبقى سعيد اوى ؟
لو رأيت النبي محمدا صلى الله عليه وسلم في المنام

تحب يبقى عندك ارض زراعية ولااجنس عربيات ولاكام عمارة ولافلوس فى البنك ؟

كام عمارة …ما قلتوش كام؟

البحر ولا النيل ؟

النيل للشرب والبحر للفسحة ومش العكس

مركب ولا طيارة ؟
طيارة

مجنون ولا عاقل ؟

أحيانا وأحيانا وفيه واحدة فيهم أغلبية

تقرا كتاب ولا تتفرج على فيلم ؟

ده سؤال بالله عليك؟ حد يرد على صاحب التاج ده بدالي
لو فيلم تسجيلي ممكن لكن خير جليس في الزمان كتاب

تمرر التاج ده لمين ؟

انتم عارفين سياستي في التاجات كل واحد حيعلق أو علق على أي تدوينة الشهر ده عندي يعتبر نفسه مررت له التاج

49 Responses to “تاج 006”

  1. بنات افكارى said

    السلام عليكم
    هانخد شرف اول تعلق عند حضرتك
    اكرمك الله كالعادة اجابات ماينفعش
    نعلق عليها بس عاجبني رد حضرتك على سؤال ليه النخوه والشهامة اتعدمت
    صحيح امال لو اتعدمت على الاخر بقى ايه اللي هايحصل ربنا يعيزنا احسن النماذج دي بنقابلها يوميا وبنعاني منها وهاندعي احنا كمان لصديقك اللي قام معاك بالواجب ربنا يرزق كل المدخنين بواحد زيه اللهم امين

    ومعلش لي سؤال هو التاج ده اجباري؟
    عموما مانقدرش نرفض لاخونا الكبير وشيخ المدونين طلب ان شاء الله نجاوب
    وعايزة حضرتك تدعيلي كتييييييييييييير
    السلام عليكم

  2. Monzer said

    ضاع منى أول تعليق
    بصراحة كنت داخل
    أقول
    طب أول تعليق ياخد ايه
    بس ضاعة منى ده

    عارف أنا المكنة الخصوصى بتاعة حضرتك كويس على فكرة
    وادامك الله لنا

  3. MiraMar said

    الله يكرمك
    هدوء نفسي وراحة بال وسكينه
    أدامهم الله عليك

  4. اليعقوبي said

    السلام عليكم
    استاذي عامل ايه؟
    احسبك علي خير ولا ازكي احد علي الله
    انا منزل تاج زي ده بالظبط بس لما شوفت ردودي وردود حضرتك الواحد فكر يشيل التاج بتاعه
    رزقك الله الاخلاص
    جامدة جدا حكاية ليه في رايك النخوة والذوق اتعدموا؟
    فعلا الخير في وفي امتي الي يوم القيامة
    لم يعدموا بعد طالما كانت ىهناك امة محمد (صلي الله عليه وسلم)0
    والسلام

  5. صيد الخاطر said

    السلام عليكم
    ماشاء الله تبارك الله
    ايه الحلاوة دي يابشمهندس
    ربنا يزيدك
    بس شكل حضرتك كبرت فعلا

    طبعا لازم تحس بكده
    لما حضرتك بتقول لنفسك ” شكلك كبرت ” وانت لسه عندك 6 سنين

    “واذا كانت النفوس كبارا تعبت في مرادها الاجسام “

    وتحياتي

  6. دكتور حر said

    جزاكم الله خيرا م محمد

    كل تاج يقربنا أكثر منكم

    ويدعونا أن ننهل ونتعلم منكم

    جزيتم خيرا
    وتقبل الله منا ومنكم

  7. عصفور المدينة said


    بنات افكارى

    وعليكم السلام ورحمة الله وبركاته
    شرفتينا نحن من نال الشرف
    والتاج يعني لو مش إجباري أكيد لازم يكون إجباري على صاحبة اول تعليق
    فتح الله على قلبك ولسانك من بركاته يا ابنتي

    Monzer

    فرق 4 دقايق كاملين يا منذر
    ونفسي اشوفك انت نسيت الوعد ولا إيه

    MiraMar

    حفظك الله يا دكتورة
    ورزقنا الله وإياك السكينة


    اليعقوبي

    عززززز
    بالعكس أنا عاجبني التاج بتاعك جدا
    جزاك الله خيرا
    لم يعدموا بس تصدق موضوع شاغلني كيف يتم تفعيل دورهم بشكل أكبر
    يعني مثلا شهامة الشهم تحتاج إلى دعم فعلا
    ياريت أكون عارف أعبر


    صيد الخاطر

    وعليكم السلام محمد
    يعني حتى انت بتقول عجزت لعلمك أنا كاتب في الدرافت عن الموضوع ده من يوم 11 /8
    وجزاك الله خيرا على البيت
    بس فعلا موضوع أول يوم مدرسة ده أنا فاكره كويس وفاكر المكان الكئيب اللي كانت الفكرة دي مسيطرة علي فيه
    وكل ما أكمر منه اضحك على اليوم ده
    ليه؟
    عشان أنا كنت حادخل في سنة وبعدين رفضوني فدخلت اللي بعدها فكانت السنة الزيادة دي مهلة إضافية احسست بقيمتها
    وبعدين لما اتخطفت بعد كدة وكل يوم أصحى بدري كدة ونظرت في أحوال الناس والتعليم 16 سنة والشغل والجيش والزواج وصلت في هذا السن إن الأيام اللي عدت دي لا يشبهها ما بعدها
    وأحسست بالفرق بين الطفولة المبكرة وما بعدها تخيل انت بقى العقد
    🙂

    دكتور حر

    احنا قريبين يا محمد جدا وانت عارف
    حفظك الله
    بس نفسي تتعرف على الراجل اللي معلق قبليك

  8. فارس عبدالفتاح said

    السلام عليكم ورحمة الله وبركاته

    إخواني الكرام / عصفور المدينة المحترم

    ابن حجر العسقلاني المحترم

    الباحث عن الحقيقة المحترم

    تحية طيبة وبعد ،

    الموضوع : طلب مساعدة .

    الإخوة الكرام بناء على ميولكم الشخصية تجاه المواضيع الفقهية والشرعية والدينية بصفه عامة ارجوا مساعدتي في احد الموضوعات الفقهية والشرعية هي : ( زواج المسيار ) فأخيراً تم إعلان دار الإفتاء المصرية عن إباحة زواج المسيار في جمهورية مصر العربية بصفة رسمية بنا على هذه الفتوى .

    وبما أني أشارك بمقال في مجلة ” الاجتماعيون ” التي تصدرها رابطة الاجتماعيين الكويتية – بدول الكويت – فقد طلب مني أن أشارك بمقال عن هذا الموضوع وتأثيره على البنية الاجتماعية في المجتمع المصري والمجتمعات العربية بصفة عامة .

    فارجوا أن تفيدوني عن هذا الموضوع من المراجع والكتب والأبحاث والدراسات الفقهية والشرعية عن زواج المسيار في اقرب وقت ممكن :

    1. تعريف زواج المسيار بطريقة فقهية من الأئمة الأربعة كل واحد على حداً .

    2. أراء الفقهاء الأربعة الإمام مالك – والإمام الشافعي – والإمام احمد ابن حنبل – والإمام ابوحنيفة النعمان – فقط لا غير .

    3. وما هي النصوص الفقهية والشرعية التي يستندون عليها في فتواهم على هذا الزواج .

    4. وما هي الشروط الواجب توافرها لصحة هذا الزواج – وما هي الأمور المخلة بشرعية هذا الزواج .

    5. وهل الزوجة لها الحقوق الشرعية كاملة في هذا الزواج من حيث المهر ومؤخر الصداق والميراث وغيرها من الأمور الشرعية .

    6. وما الفرق بينه وبين الزواج العرفي – زواج المتعة .

    7. ذكر أسماء الكتب أو المراجع أو الدراسات – أسماء المؤلفين – أسماء دور الطباعة وسنة صدوره – أرقام الصفحات المأخوذ منها النص المقتبس .

    ارجوا منكم أن تفيدوني في هذا الموضوع حتى استطيع أن أضع مقالي في الوقت المحدد ..

    تنبيه : لا أريد نسخ أو اقتباس من شبكة الانترنت أو أشرطة الكاسيت والسي دي .

    شاكرين لكم حسن استجابتكم وكريم تعاونكم ،،،

    للمراسلة عن طريق البريد الالكتروني
    :
    seragff@gmail.com
    seragff@yahoo.com

    أخوكم

    فارس عبد الفتاح

  9. أمــانــى said

    أســتاذنا
    كالعادة يا استاذنا
    بس حضرتك ما قولتش واللى معندهوش غير النيل يبقى الاتنين معآ الفسحة والشرب
    😀

  10. مصراوي أوي said

    طيب انا بقي فاكر تدوينة يوم خميس

    تدفع كام بقي يا استاذ عصفور عشان مقولش؟؟؟؟

    بس اشمعني مأذون….شايف ايه في المهنة دي يعني؟؟؟

    وطبعا اجابات روعة كالعادة

    تحياتي وسلام الله عليك

  11. امام الجيل said

    كتبت تعليق وراح كده كويس يعنى
    يلا ممكن اكتب اللى احسن منه
    مش عارف الحق المركز الاول فى المدونة
    ركبنا العداد وبرضه مش عارف
    ايه الحل ساعدونى
    حلو التاج ده ممكن ابقى اسرقه منك
    ربنا يسهل او استلفه بس
    نتكلم في ايه
    جديدة بس حكاية ماذون دى عايز اعرف السبب يا ترى يا بخت من وفق راسين فى الحلال ولا ايه
    وعلى فكرة انا عارف المكان السرى اللى بتروحه ومش هاقول لحد خالى الناس تدور هو بالساهل كده ولا ايه
    جميل التاج وحلو سؤال بتبح تكون فى اى زمن ومش عارف بيقولك تحب تشوف فيلم ولا كتاب ده كلام ميعرفكش معلش
    حد ميعرفش وحش الشاشة :))))
    بتدعيلى ولا لا
    السؤال ده سألته لاخ كان بيصلى بينا فى المعتكف بس بطريقة صعبة قعد يضحك خوفته تقريبا فادعيلى بقى من غير نظرات قويات

  12. ابن حـجـر الـعـسـقـلانـى said

    و الله شغلانة المأذون دى شغلانة حلوة .. و مكسبها مضمون .. بالتأكيد الناس مش هاتبطل تتجوز … و لو بطلوا جواز مش هايبطلوا طلاق .. و انا ابقى زى المنشار .. طالع واكل نازل واكل

    و الله أنا بافكر أغير نشاطى

  13. فاروتا المصرى said

    السلام عليكم
    استاذى العزيز
    كل عام انتم بخير
    ويارب ربنا يتقبل منكم ومنا
    اخبار حضرتك ايه
    ؟؟
    يارب تكون بخير
    وياريت نشوفك قريبا ان شاء الله

  14. آلام وآمال said

    تسلم ايدك يا باشمهندس
    والله حضرتك فعلا اتعبت كل اللي هياخد التاج ده من هنا بعد اجابات الوافية والقاطعة دي

    ربنا يكرمك

  15. Salwa said

    ما شاء الله

    بالتوفيق دوما

  16. نـــــــور said

    السلام عليكم

    بجد ماشاء الله اعجبتني كثيرا اجابات حضرتك بجد

    وخصوصا اجابة سؤال النخوة والشهامة
    ولفتت نظري انك نفسك تشتغل مأذون

    بس بجد تاج ممتع ، ربنا يكرم حضرتك

  17. الطائر الحزين said

    انا عارف المكان اللى ممكن تذهب اليه اقولة ولا أخليها فى سرى

    دعواتك يا باشمهندس

  18. زحل الفلكي said

    السلام عليكم ورحمة الله وبركاته

    باشمهندس محمد
    كل سنه وحضرتك طيب

    لفت نظري اكثر من حاجه في اجابات التاج ده

    اولها انك في اول طلعة قولت انك حسيت انك كبير لما دخلت المدرسة وعندك 6 سنين
    🙂
    اجباة مختلفة بصراحة لأني عارف كويس ان 6 سنين ده بيكون فاهم جدا بس كل الناس بتهمل الاحداث اللي حصلتلها في السن ده مع انها ممكن تكون مؤثرة في مجري حياتهم

    ايه الكلام الكبير اللي بقوله ده
    :D:D

    نخلينا في الحاجه التانيه
    وهي عدم سماع الموسيقي وعدم التدخين في زمان قل فيه جدا من يتمسك بهذا
    فانا عدو التدخين الاول
    وابحث على ان اكون عدو الموسيقى ايضاً
    لكن نسأل الله ان يعيننا يارب على هذا

    اجبات سلسة وطبيعية يا باشمهندس
    بارك الله في حضرتك

    وكل سنه وحضرتك طيب

  19. خمسة فضفضة said

    السلام عليكم ورحمة الله وبركاته

    ربنا يكرمك يا باشمهندس

    اجابات كلها في الجون

  20. عــلا said

    لا تاج طويل و لا حاجة.. ده عدى كسرعة البرق اللي ملى سماء مصر من يومين🙂 بس مع سرعته استمتعت فعلا بقرائته كاملا🙂

  21. هكذا علمتني الحياة في ظل العقيده said

    السلام عليكم ورحمة الله وبركاته
    بارك الله فيك يا أستاذي
    وأسأل الله لك الاخلاص في القول والعمل

  22. karamella said

    السلام عليكم
    كيف الحال بعد رمضان
    اسال الله ان تكون بخير حال مع الله
    ربنا يثبتنا
    كل تاج والتاني بعرف الشخصيه اكتر
    ما شاء الله فتح الله لك
    وربنا يبارك في حضرتك
    ورزقك رؤيه الحبيب المصطفي صلي الله عليه وسلم في المنام
    امين

  23. SAKAyAR said

    أنا داخل مخصوص علشان آخد التاج ده
    ههههههههه
    ليك واحشة جامدة انت والتدويييين
    يارب تكون تمام دايمًا ربنا يعزك ويحفظك
    سلام بقى علشان آخد التاج وأجري أجاوبه
    هههههههه
    ان شا الله ميرسي يا عمو محمد

  24. ض/خالد said

    أقسم بالله العظيم أن أكون عادلا بين الرعيــة

    انت افتكرت اننا الشعب واخترناك وانت بتؤدي اليمين قدامنا ؟؟

    🙂

  25. veticohaya said

    salam alikom…

    اجابات حلوة…

    بس اجاابة سءؤال لما بتعمل عمل خيري

    ايو هو صعب…بس محتاااج قرار مع النفس الاول …
    كانفسي قرء ليه اجبة بس حصل خير..:)
    وكل سنوحضرتك طيب…:)

  26. Salwa said

    عودة مرة أخرى
    للإستفسار عن التاج

    لماذا الأسئله ثابته دوما
    هل لحكمة ما

    أقترح أن من يقوم بتحويل التاج
    وفي هذه الحاله
    فالشخص المقصود هو حضرتك
    فلتتفضل بتغيير ومسح وإبدال بعض الأسئله
    وتضيف بعض الأسئلة من عندك
    بما يتناسب مع شخصيتك
    وبما تفضل
    وبعد ذلك تمرر التاج لمن تريد
    وهكذا مع كل شخص يمرر التاج

    وفي هذه الحاله أقبله بكل سرور

    وأخيرا ده مجرد رأي

  27. عصفور المدينة said


    فارس عبدالفتاح


    شكرا لحسن ظنك أخي فارس
    ولكني سألتك هل تقصد أنك تريد رأينا في الموضوع أم تريد مصادر للبحث
    أمــانــى

    برضه يشرب م البحر ما كلنا بنشرب م البحر

    مصراوي أوي

    دكتور ادفع لك التاج كله بأسئلته واجاوبه بدالك
    المأذون شغله خفيف وبيشتغل بالنسبة

    امام الجيل

    شكرا يا باشمحاسب انك كتبت مرتين
    كل مرة تستلف مني التاج
    بادعيلك يا محمد من غير نظرات مرعبة
    نفسي اشتغل مأذون عشان اشتغل شوية واقبض كثير
    واهو منه اوفق راسين
    ولو حد جاي يطلق اقنعه واعقله واعالجه

    ابن حـجـر الـعـسـقـلانـى

    يلا يا أخي توكل واشتغل مأذون

    فاروتا المصرى

    حمدا لله على السلامة يا فاروقا
    كله تمام إن شاء الله
    ربنا ييسر الظروف بس تهدى في الشغل شوية

    آلام وآمال

    محمود تعليقك جميل أوي
    والحمد لله هذه من أجمل عبارات سمعتها في حياتي كذا واحد قالوا بتتعب اللي ييجي بعدك
    اللهم لك الحمد

    Salwa

    وفقنا الله وإياك
    أنا ساعات باغير في الأسئلة بس حكاية الإضافات دي باحس اني لو عملتها حابقى باتطفل بالكلام من غير ماحد يسألني فباتكلم في إطار الأسئلة
    ويمكن ده بيكون يوضح الفروقات والتشابهات بين الناس لو الأسئلة موحدة
    بس مثلا السؤال اللي فيه اسم الديوان والمدونة والدار انا حذفته والناس اللي جم بعدي شالوه

    وعيله يا أستاذة فقد تقرر أن نتابع مع حضرتك في انتظار اسئلة معدلة وإجابات رائعة إن شاء الله

    نـــــــور

    وعليكم السلام ورحمة الله وبركاته
    شوفي ليه أنا عايز اشتغل مأذون فوق

    الطائر الحزين

    ابقى قابلني هناك

    زحل الفلكي

    حبيبي يا محمد
    متشكر انك مررته لي
    وأمي باحكيلها حاجات تقولي كان عندك 3 سنين
    والحمد لله
    أعاننا الله وإياك على طاعته

    خمسة فضفضة

    دكتورة انتظر إجاباتك الحكيمة أيضا

    عــلا

    الأستاذة الفاضلة علا عثمان
    شرفتينا وعودا حميدا
    وشكرا على التشبيه الجميل

    هكذا علمتني الحياة في ظل العقيده

    أسأل الله لي ولك الإخلاص

    karamella

    الحمد لله بخير يا أستاذة ونرتينا
    رزقنا الله وإياك رؤية الحبيب
    صلى الله عليك وسلم

    SAKAyAR

    يا بني ده انت بالذات أكثر واحد نحب التاج منك
    انت مصيبة وخاصة انك مش عادل انت طاغية

    ض/خالد

    شوفت يا خالد شوفتني وانا عايش الدور
    انا فعلا كنت باحاول اتخيل الدور
    هههه

    veticohaya

    وعليكم السلام أختنا الفاضلة
    شرفتينا أول زيارة
    بخصوص السؤال
    الإجابات المحتملة لسؤال النية

    نعم
    لا
    أحيانا

    نعم =تزكية جامدة للنفس وفيها قدر من الكذب
    لاوأحيانا= فيها مجاهرة بالمعصية وهزيمة نفسية أما النفس والشيطان

    السؤال ده عامل زي سؤال هل أنت مؤمن كامل الإيمان
    فالإجابات عليه صعبة

  28. محمد مارو said

    الف مبروك ع التاج

  29. دعوة الفردوس said

    أخونا الفاضل
    المحترم جدا
    شيخ المدونين
    عصفور المدينة
    جزاكم الله خيرا ورزقكم الاخلاص والطاعة وحسن الخلق وثبتكم في الدنيا والاخرة

    أعجبتني جدا اجابات العدل
    وتمنيت للحظة لو انك انت حاكمنا
    وعلى فكرة اجابة العصور بتاعة مصر كانت تكون نفس اجابتي لو اني اجبت التاج اولا
    وايه تاني يابت يادعوة الفردوس
    التاج كله حلو جدا
    وان شاء الله لما تحول النشاط وتبقى مأذون محدش هيعقد قراني غير حضرتك
    ومتخفش معاك وقت تحول فيه نشاطك
    معاك لحد 10 سنين براحتك بقى

  30. جمعاوى روش طحن said

    المهندس عصفور المدينة
    “شيخ المدونون ”

    مش عارف ح تبقى المدونين ولا المدونون

    أخوكم بتاع رياضيا مش عربى

    الشاهد

    إجاباتك كلها تمام

    و موضوع تدوينة يوم خميس ده

    كلنا عارفيينه

    و تاج مقبول

    بس صبرا على إجابته شوية

  31. صانعة الحرية said

    السلام عليكم
    الاجابات اكتر من رائع
    اضحكتنى وابكتنى
    اضحكنى تعليق حضرتك على النخوه
    وعجبنى تعليق حضرتك ازاى تكون حاكم عادل عجبنى جدا
    وبكيت لامنيتك وهى رؤية الحبيب صلى الله عليه وسلم لانها امنيتى التى كثيرا ما ابكتنى وانامتنى على بكاء
    اعدك استاذى وابى الفاضل ان ادعوا لك اليوم مع ختمة قران اليوم والله ان شاء الله يا ابى سادعوا الله لك ان ترى الحبيب صلى الله عليه وسلم لكن اقسمت عليك اذا رايته بلغه منى السلام
    وبلغه انى على خطاه ما استطعت واساله اراضاً هو عنى

  32. صانعة الحرية said

    استاذى ياريت حضرتك تبقى تحدد اسماء تيعت اليهم التاج
    الحكايه دى يتنرفز والكل هيتحرج يجاوب عليه

  33. حـريــة الــفـكــر والابــداع said

    تحية – لسيادة الرئيس – عصفور المدينة وحقيقة انا عزيت حضرتك اوى وخصوصا ان حضرتك بتكرة الظلم اوى
    تحية لحضرتك

  34. david santos said

    The regime of Mubarak and his minions is every day to transgress human rights. More than 10,000 Sudanese refugees are arrested and more than 100 have been killed.
    Illustrative of the world arrogance and the atrocities committed against the Sudanese refugees by this criminal regime of Bubarak.

  35. فارس عبدالفتاح said

    السلام عليكم ورحمة الله وبركاته

    الاخ الفاضل المحترم عصفور المدينة

    تحية طيبة وبعد ،

    ياخي انا لم اقصد ان اختبرك او اختبر الاخ الباحث عن الحقيحة وابن حجر العسقلاني

    ولكن بكل صدق واشهد الله على اني فعلا محتاج الى هذا الموضوع في مقال سوف اشارك به فى مجلة الاجتماعيين بدولة الكويت

    لكن اريد الالتزام بالشروط التى وضعتها حتى نلتذم للامانة العلمية والشرعية والفقهية

    فارجو الافادة فى هذاالموضوع وشكرا لك

    وتقبل كل الشكر والحترام

  36. ftataljanna said

    السلام عليكم

    على فكرة البوست بتاع ال ار اس اس

    انا كنت ناوية اطلب من حضرتك ططريقته🙂

    سبحان الله

    اما عن التاج ده
    فتاج حلو

    ان شاء الله ابقى اخده ربنا ييسر والاقى وقت ان شاء الله

    جزاك الله خيرا

  37. أمير القلوب said

    السلام عليكم ورحمة الله وبركاته
    أخي عصفور المدينة
    آسف على التأخير
    بس ردودك في التاج ده عرفتنا عليك اكتر وعلى شخصيتك
    جزيت خيراً
    تحياتي

  38. حلم الحرية said

    كالعادة اجابات رائعه عالتاج

    عجبتني اجابة سؤال ايه اللى بيبوظ الحكام

    مختصرة وفي الجون

    وضحكت اوي علي بدايةاجابة سؤال لو انت حاكم عادل
    أقسم بالله العظيم ان أكون عادلا بين رعيتي ما استطعت وألا أتبع الهوى

    احم
    واضح ان حضرتك صدقت وهتبدا تنفذ

    اما اجابة السؤال نفسها ففي الصميم كالعادة

    وطبعا مهم اوي تعرف عدد العمارات يعني تفرق طبعا هما كام عمارة قبل ما حضرتك تقرر تجاوب

    بالنسبة لسؤال امتى حسيت انك كبرت
    انا كنت كل ما اتنقل لمرحلة دراسية جديدة اقعد افكر نفسي واقول انا كبرت واني عايزة ارجع اصغر تاني
    بس بصراحة مش لدرجة 6 سنين

  39. bocycat said

    عصفور المدينة اجاباتك كلها عقل واتزان .. وفيها تدين واضح .. احييك

  40. ammola said

    هييييييه…اول تعليق
    بعد تمانية وتلاتين
    والله حضرتك مش حتصدق لو قلت لك ان كل اجاباتك-تقريبا -انا كنت متوقعاها مش فذلكة منى بس الواحد يعنى عرف يكون فكرة عن حضرتك وعن الخط اللى انت منتهجه وماشى فيه ما عدا طبعا الاسئلة الشخصية
    اجابات متفائلة وتدعو للتفاؤل
    بس احلى اجابة اللى كانت على سؤال انت عندك امل اجابة فيها عمق جميل

  41. شهاب الأزهر said

    إجابات رائعة وإن حمل الكثير منها مراوغات، فقد جاء بعضها تعليقا على صيغة السؤال وليس إجابة لمضمونه

    مثال: السؤال عن سبب النخوة والذوق، كان الممكن أن يتم توضيح وجهة النظر أنهما لم يعدما ثم تتم الإجابة عن سبب انحسارهما كقيمتين في المجتمع

    لكن حتى المراوغات كانت جميلة وتمت بذكاء عالٍ

  42. Noony said

    كل سنة وحضرتك طيب

    يعني ايه الموازنة بين الأصحاب والباقي صعبة؟
    اللي أعرفه إن حضرتك مهندس كمبيوتر…بس كان نفسك تبقى مأذون أو درس لغة عربية؟ جامدة دي…أحترم جداً الناس اللي بتقدر اللغة العربية

    حسيت انك كبرت من سن 6 سنين؟ عشان دخلت المدرسة؟ مش بدري أوي؟؟

    حضرتك شخصية رزينة جداً ومحترمة جداً…وبجد أنا مبسوطة جداً اني أقرأ لحضرتك

    بالنسبة للتاج…أنا لسة حلاه عندي…يعني أنا كدة براءة الحمد لله

    🙂
    نهاد

  43. hend...hanady said

    اجاباتك رائعة الله يكرمك بس اعتقد لو التكنولوجيا اتغلت هيبقى احسن هيرجع الانسان لطبيعته بدل ما كل حاجة بقت تكنولوجيا وجنابه قاعد بيتفرج على زيارة الاقارب بقت ميسدات

  44. sa7arkash said

    استاذنا الجليل
    اجاباتك نموذجية
    انت لابتنقل من سلاح التلميذ ولا الاضواء

    بجد انا شفت لك تاج قبل كدة وقلت لك انك انسان محترم جدا …وطبعا ما زلت عند نفس الرأى
    تحياتى لحضرتك

  45. عصفور المدينة said


    محمد مارو

    الله يبارك فيك اتفضل

    دعوة الفردوس

    أستاذة
    جزاك الله خيرا
    أنا ما عنديش مانع أحكم مصر إذا انت مصرة يعني بس لو ش تحلفي
    وانت طبعا حتجاوبي ع التاج
    هو انت قاعدة معانا في التدوين عشر سنين احنا عايزنكم تتجوزوا وتتوكلوا على الله وتسيبونا احنا نخبط في بعض هنا

    جمعاوى روش طحن

    إيه يا حاج جمعاوي
    ينفع المضاف إليه يترفع؟
    بارك الله فيك

    صانعة الحرية

    الله المستعان ادعي لنا
    لي ولك وأن نكون أهلا لذلك

    صانعة الحرية

    أنسخ يعني الأسماء تاني دي كلها
    حضرتك اتبعت لك التاج

    حـريــة الــفـكــر والابــداع

    شكرا سيدي المواطن

    david santos

    Welcome thanks for your care for our Sudanese murdered brothers.

    فارس عبدالفتاح

    أخي فارس اعذرني للتأخير وأنا لم أفهم أنك تختبرني ولكني كنت أسأل هل أنت تريد رأيي أو تريد توثيقا لأراء الأئمة
    والمسألة جديدة أصلا
    ومدخلها
    هو تعريف الزواج وشروط صحته
    وثانيا حقوق الزوجة وحقوق الزوجة
    وثالثا الشروط في الزواج وما يصح منها ومالايصح
    وذلك البحث كبير ولم أجد حتى الآن الوقت لتوثيقه
    ولكن أستطيع أن اتكلم عن الآثار الاجتماعية لزواج المسيار وهو شيء آخر غير الزواج العرفي وغير زواج المتعة
    زواج المتعة أو قل المتعة لأن الإسلام أبطل كل زواج محدد المدة هو منسوخ
    ونفس الزواج العرفي له شقان الأول الزواج العرفي أي الزواج العادي ولكن مع فرق عدم تسجيله في الشهر العقاري أو عند المأذون فهاذ مكروه حايلا في ضوء مستجدات العصر
    وأما مايعرفه شباب الجامعات فليس زواجا ونرجع إلى مبحث شروط صحة الزواج

    نعود إلى زواج المسيار فهو زواج تتنازل فيه الزوجة عن بعض حقوقها ويتنازل ايضا الزوج عن بعض حقوقه لظروف اقتصادية وفرق بين أن يكون الأمر مباحا أو يكون أمرا عاما
    يعني مثلا صلاة السنة يجوز تركها ولكن لو تركها جميع الناس لهلكت الأمة

    المهم أن هذا له توابع اجتماعية كثيرة

    من عدم الاستقرار
    سهولة الطلاق والتغيير وانظر إلى الشارع كيف منع المرأة أن تخرج من بيتها حتى في ظرف الطلاق وذلك لإعطاء فرصة للاستمرار
    فقدان الرجل القوامة على المرأة والقوامة المادية والعائلية للرجل مرتبطة جدا بالقوامة الأخلاقية وحفظ الأخلاق
    انتشار القيل والقال وخلط الزنا بزواج المسيار في الظاهر
    الضرر النفسي على المرأة والترقب والانتظار والوحدة التي قد تسيطر عليها في غياب الزوج
    تحويل النظرة إلى الزواج إلى نظرة جنسية فقط بينما الزاج الحقيقي فيه مودة ورحمة وتعايش وتبادل الخبرات وتبادل الهموم والتفاعل الشخصي والمعايشة بين الزوجين
    أيضا خروج مثل الفتاوى هو لتبرير واقع حصل نتيجة مخالفات شرعية بدلا من التوجه للإصلاح الاجتماعي لأسباب ظاهرة العنوسة
    ومشاكل السكن والمغالاة في المهور وتقصير الحكومات في أداء دورها وتأخير سن التعليم وغيرها من الأسباب المعروفة لصعوبة الزواج
    فالتوجه الصحيح هو للإصلاح الاجتماعي للظاهرة

    هذا لا ينفي صحة الزواج من حيث الصحة في رأيي لأنه زواج لم ينتف أي من اركانه طبعا ع كونه علينا مشهرا وعليه شهود ومسجل عند المأذون ولها كافة الحقوق التي تضمن استمراريته وصعوبة التلاعب به هذا رأي سريع وربما يكون يفتح النقاط


    ftataljanna

    انت بس تفكري واحنا ننفذ يا أستاذة


    أمير القلوب

    جزاك الله خيرا سمو الأمير

    حلم الحرية

    أنا ما دصقتش ولا حاجة أنا كنت عايز أعيش الدور بس دي فيها قلب نظام حكم
    أنا عارف ان انتم مش مصدقين حكاية 6 سنين عشان كدة حلفت عليها
    أنا فاكر حاجات من سن 3 سنين يا محترمين نافوخي حيضرب يا عالم


    bocycat

    عاقل……امممممم
    يبدو إنك مش قريتي سؤال عاقل ولا مجنون كويس

    ammola

    فين المدونننننننننننننة
    أنا زعلان انك مش بتوافقي على الطلب ده


    شهاب الأزهر

    والله مش مراوغة يا شوشو
    بس احنا بنتكلم في المواضيع دي بشكل منفصل
    عارف التاج اللي فات كنت عايز انزل مجموعة بوستات عن كل نقطة فيه تخيل
    فالواحد بيحول السؤال إلى نبذة فقط لكن كدة الناس تهرب من قراءة التاجات دي تبقى محاضرة وفي انتظار إجاباتك
    وكان فيه بوست عند الأخت رفقة عن موضوع الشهامة وعلقنا كلنا عليه واتناقشنا


    Noony

    براءة يا أستاذة
    بس مش عارف انتم مش مقدرين إن المأذون بيكسب كويس
    هو أساس الشغل وسيلة للكسب بالدرجة الأولى وجنبه شوية حاجات تانية
    وده اللي انا عايز انبه إليه


    hend…hanady

    كل سنة وانت طيبة
    بس لتكنولوجيا برضة بتقضي حاجات
    بس الإسراف في إعطائها أدورا على حساب الواقع فعلا مأساة
    على فكرة انت علقتي وانا باكتب الردود يعني لحقت الطبعة

  46. بنت الاسلام said

    اجمل رؤية

    رؤية الرسول عليه افضل الصلاة والسلام
    ربنايكتبهالك يارب

    بس البحر للفسحة بس

    وفعلا كلنا كنا نتمني نعيشفي عصر الفاروق

    واحساسك بالعدل قوي جداا

    تاج جميل

    بكل توفيق دايما يارب

    تحياتي

    بنت الاسلام

  47. عصفور المدينة said

    بنت الإسلام جزاك الله خيرا
    وإحساس العدل فيه مجال لتطبيقه في كل لحظة من حياتنا وفي كل مسئولية مش لازم يعني تنتخبوني
    🙂

  48. Lapa said

    قمة عالمية البرتغا الكاتب cristovao دي اغيار.

    وهو ، أيضا ، وترجمت الى اللغة البرتغاليه ثروه الامم من آدم سميث.

    وقد منح العديد من الجوائز.

    لا تنسوا اسم هذا الكاتب العظيم ، يمكنك الاستماع اليه قريبا.

    اشكركم على انفاق الوقت في الثقافة العالمية.

    شكرا للزيارة

  49. Ahmed Essawy said

    😦
    انا جاي متأخر قوي …
    اجابات كويسه بس انا مش معاك في ان
    ==
    في حاجات لازم قطع الأمل ودي نقطة لو الناس تفهمها تستريح
    ==
    انا شايف و دي وجهه نظر شخصيه ان لامل علطول يكون في مل …
    لانه هوه الي بيشجع الواحد و بيديله دافع …

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: